News
10. de dezëmber: Al vá en forza orars nüs
Agenzia provinciale per la Mobilità: Coliamënc dl bus implü sön n valgönes linies, n valgönes mudaziuns y val' adatamënc pro i orars de partënza y pro i percursc – Ince chësc ann él de majeres y de mëndres novités por ci che reverda l'orar dl bus y dla ferata, che vá vigni ann en forza le secundo fin dl'edema de dezëmber. „Vigni ann se porvunse danü da ti jí adincuntra ai dejiders dles zitadines y di zitadins“, sotrissëia l'assessur provinzial por la mobilité Florian Mussner. Cun l'ampliamënt dl'oferta orunse che ciamó de plü porsones s'anüzes di mesi dl trasport publich, i orun alisiré les strades ti zëntri de conzentraziun dl trafich individual y dantadöt colié damí i posć periferics tl raiun rural cun la rëi dl trasport publich.
Ince a livel visif él gnü mioré zacotan de cosses: sön les tofles por i orars dla ferata él sëgn le simbol de n scagn da rodes pro dötes les staziuns dla ferata y dötes les ferates che n'á nia impedimënc architetonics.
Ferata: Novités pro la „Freccia“ y „Italo“
Por ci che reverda les ferates locales n'él chësc iade degönes mudaziuns dl orar, mo bëgn pro les ferates che fej destanzes lunges: la „Frecciargento“ che röia a Balsan dales 11.14 y pëia ia da Balsan dales 13.16 jará sëgn vigni de ia por l'edema, impede ma tratan le fin dl'edema sciöche denant. De vëndres, sabeda y domënia s'archita sëgn ince tratan i mëisc da d'invern cina ai 31 de merz na „Freccia“ tla staziun dla ferata de Auer, da olache ara pëia ia dales 17.24 y vá a Roma, le medemo vel ince por chëra che pëia ia da Roma dales 6.45 y röia a Auer dales 11.01 y spo a Balsan dales 11.14. N coliamënt dla ferata implü Balsan-Roma sarál da agost dl 2018 inant cun la ferata da na gran velozité „Italo“: ara pëia ia da Balsan vigni de dales 6.41 y röia a Balsan dales 18.00.
Überetsch-Balsan: NOVITÉ tresfora vigni 15 minüc
N'atenziun particolara ti vá ai coliamënc dl bus danter Balsan y l'Überetsch, olache al vëgn sëgn lauré fora dassënn i coliamënc dl bus dl Überetsch-Express: N bus vigni 15 menüc sön la trassa Kaltern – Eppan – Balsan ne sarál tl dagní nia ma plü ti orars de majer trafich, mo döt le de dal lönesc al vëndres. La jënt che vá cun le bus dl Überetsch n'á sëgn insciö nia ma vigni mesora, mo bëgn vigni chinesc menüc tratan döt le de n bus por Balsan. La domënia y i santus vá i busc vigni ora zënza interuziuns y da doman mëti man da jí plü adora.
La realisaziun dl conzet dl metrobus vá inant: i coliamënc dl bus gnará tosc feter radoplá tl raiun de conzentraziun Überetsch-Balsan y man man gnarál realisé le conzet dl metrobus; chëstes é mosöres concretes por mioré debota cotan l'„oferta de mobilité zënza auti“ y baié insciö sö ciamó plü porsones da adoré i mesi dl trasport publich.
Les atres mudaziuns dl orar tl Überetsch y tl raiun sot Balsan: pro la linia dl bus 132 vá sëgn le bus ti dis da laur vigni mesora ince a St. Anton/Kaltern y de domënia gnará la trassa Balsan – St. Anton arlungiada cina St. Nikolaus.
De iadi dl citybus implü les domënies dla linia 135.3 s'anüza tl dagní dantadöt Oberplanitzing, deperpo che le coliamënt dl bus Eppan – Montigglersee dla linia 139 piará ia tl dagní da Eppan zënter y rovará ince dailó.
La furnadoia dla Mendola vá inant vigni 20 menüc zënza interuziun cina do Gnissant.
La linia dl citybus 122 dl raiun sot Balsan vá sëgn de domënia y i santus ince tla fraziun de Kurtatsch Graun, mo ne s'archita nia plü, aladô de n'acordanza cun le comun vijin, a Tramin paisc y Festplatz.
Balsan
Ince a Balsan ciaron da lauré fora inant i coliamënc dl bus y da i mioré. Do che al é rové pormez impormó dan da n valgönes edemes la linia 18 nöia, pëia ia ai 10 de dezëmber ince la linia dla SASA 15, che fej vigni mesora la roda incër Balsan Zënter/Balsan Paisc ia y olache al gnará adoré le proscimo ann tl cheder de n proiet pilot i busc eletrics.
La linia 12 ne jará tl dagní nia plü tres Balsan Paisc/Runkelstein, mo tres la strada Perathoner – punt dl Talvera – strada Diaz – strada Gungina cina a Ciastel Runkelstein y indô zoruch.
Na roda nöia él ince por la linia dla Sasa 1 sön la trassa Balsan staziun dla ferata, punt dl Talvera, strada Cadorna, strada Fago, Plaza Gries. A chësta moda vëgnel porté ite le coliamënt diret tan dejidré dla linia 1 cun Gries.
Raiun incër Balsan
Pro de plü linies dl bus dlungia Balsan röiel pormez dai 10 de dezëmber inant iadi implü, insciö sön la linia 150 Sarntal – Balsan domisdé tert ti dis de scora danter Sarnthein y Asten, sciöche ince sön la linia 156, ti dis da laur domisdé tert danter Balsan y Jenesien.
Sön la linia 170 él vigni de dales 20:00 n coliamënt nü danter Ciastel y Balsan, sciöche ti dis da laur dales 7:35 n iade nü Ortijëi – Ciastel.
Ince al orar dl bus sostitutif tratan i laurs de manutenziun anuai dla furnadoia dl Ritten gnarál ajunté le proscimo ann da sëra dales 20:32 n iade implü danter Balsan y Ritten.
Maran, incër Maran ia y Val Venosta
Dui adatamënc él pro i busc de cité a Maran: n iade suplementar pro la linia 2 dales 07:22 Sinich – Maran, siöche ince n ampliamënt dla linia 13 Maria Himmelfahrt – Trautmannsdorff cina Maran 2000.
Iadi surapró él danterlater da doman adora pro la linia dl bus 235 Maran – Vellau, da misdé ti dis de scora pro la linia dl bus 245 Maran –Ulten y d'isté da sëra sön la linia 271 por Stilfs y Trafoi.
De mëndri adatamënc y n smendrimënt a 4 iadi a nöt él pro le nightliner-bus tl Burggrafenamt.
Al vëgn lauré fora cotan i coliamënc dl bus tl'Alta Val Venosta cun indöt sis iadi implü sön la linia 276 tl raiun Langtaufers – Graun, cun l'introduziun dl coliamënt dl bus dla linia 277 ince d'invern por Schlinig - Mals, sciöche cun la linia dl bus daldöt nöia 280 Planeil – Mals; düc i iadi implü é düc gnüs organisá en colaboraziun cun le comun de Mals.
Val dl Isarch y Alta Val dl Isarch
Ince tla Val dl Isarch y tl’Alta Val dl Isarch vëgnel renforzé n valgügn coliamënc dl bus y en pert organisá danü, sciöche por ejëmpl la linia 321, che vá sëgn ince d'isté vigni mesora danter Porsenú y la telecabina dla Plose.
Sön la linia 346 Barbian – Pruca – Tlüses vá le bus sëgn ince la domënia y i santus, mo spo ne vál nia plü tan gonot de sabeda. Döt l'ann y insciö ince i mëisc da d'invern jará tl dagní les linies dl bus 355 Ortijëi – Bula/San Jan y le bus dl paisc Ortijëi.
Sön la trassa Gherdëna – Pruca sarál cun la linia 350 tl dagní ince la domënia y i santus n bus che vá vigni ora.
N coliamënt dl bus implü ará la jënt sön la linia 311 Sterzing - Wiesen - Pfitsch y la linia 342 danter Schnauders y Feldthurns.
Val de Puster:
Sön scomenciadia dl comun él gnü porté ite le bus de munt Gais (linia 457), a na moda che le paisc sides sëgn colié damí ala rëi dl trasport publich. Al vëgn indô metü a jí la linia dl bus 456 San Jan tla Val Aurina. Le citybus de Türesc passa sëgn por Mühlen sides da jí che da gní zoruch. De pici adatamënc y de pices mudaziuns él pro le citybus da Perca, pro le citybus Valsperch-Taisten, sciöche ince pro la linia 464 tla Val Badia.